ნავთობი

ნავთობი მსოფლიო ეკონომიკისა და პოლიტიკის ერთ-ერთი მთავარი განმსაზღვრელი პროდუქტია.

COVID-19-ის პერიოდში ადამიანებმა გააჩერეს მანქანები, თვითმფრინავები და სხვა სახის ტრანსპორტი, შესაბამისად ნავთობზე მოთხოვნა 25%-ით შემცირდა.

ნავთობმომპოვებელ ქვეყანათა გაერთიანების ერთ-ერთმა წევრმა – საუდის არაბეთმა თქვა: მოდი მსოფლიოში 1.5 მილიონი ბარელით შევამციროთ დღე-ღამეში ნავთობის მოპოვება, ამით მარაგებს შევამცირებთ და ფასები ძალიან აღარ დაეცემა.

ამაზე ნავთობის ერთ-ერთმა ყველაზე დიდმა მომპოვებელმა ქვეყანამ – რუსეთმა უარი განაცხადა და თქვა, რომ ის არ შეამცირებდა წარმოებას. საუდის არაბეთი გაბრაზდა და გადაწყვიტა თვითონაც შემცირების მაგივრად 12 მილიონ ბარელამდე გაეზარდა ნავთობის მოპოვება დღე-ღამეში და ბოლო 20 წელიწადში ყველაზე დიდი ფასდაკლება დაეწყო, რაც ნავთობის ფასს იმდენად დააგდებდა, რომ მისი მოპოვება ყველა ქვეყნისთვის წამგებიანი გახდებოდა.

მართლაც, 2019 წელს ნავთობის საშუალო ფასი 55$-იყო, ახლა კი 33$-ია. მსოფლიოში 1.2 მილიარდი ბარელი ნავთობის შესანახი სივრცეა, ამიტომ ჭარბი რაოდენობის და ადგილის სიმცირის გამო, არის შემთხვევები, როცა ნავთობის ვადიანი საბირჟო კონტრაქტები 0$-ზე დაბლა ჩავიდა.

ეს პროცესები სხვადასხვა ქვეყნებს შორის ურთიერთობებსა და ეკონომიკაზე მნიშვნელოვან გავლენას მოახდენს. ცხადია, ეს სიტუაცია დიდი ხნის განმავლობაში არ გაგრძელდება, 1 მაისიდან ზოგიერთმა ნავთობმწარმოებელმა შეამცირა კიდეც მოპოვება, მალე ხალხი კვლავ დაიწყებს ტრანსპორტის გამოყენებას და ნავთობის ფასები უწინდელ სიტუაციას დაახლოებით 2021 წლისთვის დაუბრუნდება.